حجت الاسلام حسین تقی پور، جو مازندران کے حوزہ علمیہ کے اساتذہ اور محققین میں سے ہیں، نے "اسلام کی نظر میں مسرت اور شادابی کے راستے” کے عنوان سے سلسلہ وار مباحث پیش کیے ہیں، جو مختلف اقساط میں "خوشی کا فارمولا” کے عنوان سے آپ فرهیختہ حضرات کی خدمت میں پیش کیا جا رہا ہے۔
مسرت اور خوشی کا حقیقی مفہوم
ہمارے نزدیک "مسرت و خوشی” سے مراد وہ بےتکلف اور ہلکی پھلکی ہنسی نہیں ہے جو عام طور پر لوگوں میں رائج ہے۔ عام بول چال میں اسے کبھی کبھی "دل مستی” یا بے فکری کی کیفیت کے طور پر لیا جاتا ہے، لیکن ہمارا مطلب یہ نہیں ہے۔
مسرت اور خوشی کا یہ مطلب نہیں کہ انسان اس قدر ہنسے یا اس طرح زندگی گزارے کہ وہ فضول قہقہوں، بےجا ہنسی اور محض دنیاوی لذتوں جیسے گھر، گاڑی اور کپڑوں وغیرہ میں ڈوبا رہے۔ ہرگز ہماری مراد ایسی چیز نہیں ہے۔
چنانچہ اگر کسی کی زندگی اچھی ہے یا اس کے پاس بہت زیادہ سرمایہ ہے، تب بھی وہ ہماری بحث کے دائرے میں آ سکتا ہے۔
"ہماری مراد "مسرت اور خوشی” سے یہ ہے کہ انسان کبھی بھی اپنا حوصلہ اور مقصد نہ کھو دے؛ کبھی بھی مایوس اور ناامید نہ ہو؛ نہ خوشی اور خوشحالی کے دوران میں اور نہ ہی مصیبت اور پریشانی کے وقت۔
"مسرت کا مطلب یہ ہے کہ انسان کے عبادتی جذبے، بندگی کے فرائض اور نیز کام کاج کے حوصلے کبھی ختم نہ ہوں۔”
اگر چار لوگ "واہ واہ” کریں یا کچھ لوگ "ہائے ہائے” کریں، تو نہ تو اس تعریف کا اور نہ ہی اس ملامت کا انسان کی زندگی کے راستے پر کوئی اثر ہونا چاہیے۔ مسرت کا مطلب یہ ہے کہ انسان اُکتاہٹ اور مایوسی کا شکار نہ ہو، بلکہ حوصلے کے ساتھ اپنا سفر جاری رکھے۔ یہاں تک کہ اگر اسے اپنے قریبی لوگوں کی طرف سے بھی دھوکہ یا صدمہ پہنچے، یا گھر کے اندر مشکلات کا سامنا ہو، یا باہر کچھ لوگ اس پر طنز کریں، تب بھی اسے اپنے عقائد پر قائم رہنا چاہیے اور اپنے مقصد کی طرف پوری لگن کے ساتھ بڑھتے رہنا چاہیے۔
مسرت کا یہی مطلب ہے کہ اگر کوئی اسلامی نظام میں کوئی ذمہ داری رکھتا ہے، یا اگر کوئی معلم، روحانی، مزدور، کلرک، کسان، چرواہا، فوجی، آرمی، سپاہی یا پولیس اہلکار ہے، تو وہ کبھی تھکے نہیں؛ نہ پیداوار میں، نہ اس پاکیزہ زندگی کی تعمیر کی کوشش میں جس کا اہل بیت(ع) نے فرمایا ہے، اور نہ ہی قناعت اور استعمال کے انتظام میں۔
مسرت کا مطلب یہ ہے کہ انسان یہ جذبہ کبھی نہ کھو دے۔ البتہ مسرت کا یہ مطلب ہرگز نہیں کہ انسان کبھی تھکتا ہی نہیں ہے۔ ایسا بھی ہوتا ہے کہ انسان تھکن کی شدت اور دوسروں کے ایذارسانی کے رنج سے تنہائی میں آنسو بہائے یا نماز شب میں خدا سے اپنا دکھڑا سنائے۔ جیسا کہ قرآن کریم حضرت یعقوب علیہ السلام کے حوالے سے فرماتا ہے: "إِنَّمَا أَشْکُو بَثِّی وَحُزْنِی إِلَی اللَّهِ”؛ یعنی میں اپنی پریشانی اور غم صرف اللہ ہی سے بیان کرتا ہوں۔
مسرت کی عملی مثالیں
منقول ہے کہ ایک دن کچھ لوگ امام خمینی(رہ) کے پاس گئے اور کہا: "آقا جان! ہم تھک گئے ہیں۔”
انہوں نے فرمایا: "خدا کی قسم! اگر تم ساری دنیا میں گھومو، تو خمینی سے زیادہ تھکا ہوا کوئی نہیں پاؤ گے۔” اس کے باوجود، ان کے وجود میں حقیقی مسرت واضح طور پر نظر آتی تھی۔
جب ان کی رگ میں انفیوژن لگا ہوا تھا، تو دو آدمیوں کو ان کا سر اٹھانا پڑتا تھا تاکہ وہ کھڑے ہو کر نماز پڑھ سکیں۔ یا اسی وقت شدید پیٹ کی بیماری میں، جب ان کا پیٹ ایک لاعلاج بیماری کی وجہ سے نکالنا ضروری ہوا، تب بھی وہ اس بات پر قائم رہے کہ عمامہ سر پر رکھیں، داڑھی میں کنگی کریں، خوشبو لگائیں اور قرآن پڑھیں۔
تقریباً نوے سال کی عمر میں ہسپتال کے بستر پر انہوں نے وصیت کی: "میرا بستر قبلہ رخ کر دو۔” اور اگرچہ انہیں کھڑا ہونے کے لیے دو آدمیوں کی مدد درکار تھی، لیکن انہوں نے نماز بیٹھ کر پڑھنے سے انکار کر دیا؛ جب تک ان میں کھڑے ہونے کی طاقت تھی، وہ کھڑے ہو کر عبادت کرتے تھے۔ یہی تو جان دے دینے تک اپنے فرض کو انجام دینا ہے اور یہی حقیقی مسرت ہے۔ اس قسم کی مسرت اسلامی معاشرے کو ترقی دیتی ہے۔
امیرالمومنین حضرت علی علیہ السلام اپنے ایک خط میں مالک اشتر کو اس طرح لکھتے ہیں: "خدا کی قسم! اگر ساری کفر کی طاقتیں میرے مقابلے میں آ کھڑی ہوں اور زمین دشمنوں سے بھر جائے، تو مجھے ہرگز کوئی خوف نہیں ہوگا۔” اور اس کے بعد اس جذبے کی وجہ یوں بیان فرماتے ہیں: "کیونکہ مجھے یقین ہے کہ میں ہدایت اور سیدھے راستے پر ہوں اور وہ گمراہی میں ہیں۔” یہی یقین ان کے جوش اور بہادری کا سرچشمہ ہے۔
قاسم بن الحسن علیہما السلام نے شب عاشورا اپنے چچا امام حسین علیہ السلام سے پوچھا: "چچا جان! کیا ہم حق پر ہیں یا نہیں؟” امام نے جواب دیا: "ہاں، ہم حق پر ہیں۔” تیرہ سالہ نوجوان قاسم نے کہا: "پس اس راہ میں موت میرے لیے شہد سے بھی زیادہ میٹھی ہے۔” یہ وہی جوش اور امید کا جذبہ تھا جو انہوں نے اپنے نانا اور اہل بیت(ع) کے مکتب سے سیکھا تھا۔
